مسدار ستيت

استعرض الموضوع السابق استعرض الموضوع التالي اذهب الى الأسفل

مسدار ستيت

مُساهمة  زكريا عبدالرازق في الثلاثاء أبريل 07, 2009 5:18 pm

الاخ عبدالقادر النوبى لك التحية والتقدير وانت ترمينا بتلك التراثيات الجميلة
ولكم هذا المسدار للشاعر عبد الله احمد ابوسن

من ستيت نويت عابيلي خترة
فوق ظهر البشاري الدومتو تترى
يسلفق في الخبيب ما جابلو عترة
جلوس ام خد هناك كل ساعة بطرى
*****
مسكتو الدرب ونشتو وقفي شارد
تقول كلبا سلوق لي صيدتو طارد
بعنف الكور صحيح ما نقي بارد
مشيرع البير صباح إدلى وارد
*****
شرب مايا قليل بسراع جبدتو
كربلو المحقبة وشديت غردتو
عدل ركبي المعاي بي الدرب زردتو
طريت اللي الجمال بالحيل نقدتو
*****
قبل أوشام قطع سيتيت مجري
غشيت ود الحسن شيخنا البقري
قت يا خوجلي أبو الجاز وبري
توصلني أم شليخ تبرد لي حري
*****
ترى أم دالات قطعها التيس وغرب
تقول ديك هضلما بالخيل مسرب
طريت الصاغ سليم ماه المكرب
متل هسع بخاف كبريتو عرب
*****
غشيت أولاد نمر بدي التحية
فتق لو الشد هناك ساعة شوية
حسارات أم قبيل زادن علي
فلانة الفي البنات سلكة وصبية
*****
فوق الدرب لبس توبي المعشرن
زملنا مخنقات كل حين يدشرن
رقادكن يا جمال عن زولي أبشرن
وجيها منطرح ماهو المكشرن
*****
خبك يا جمل مالو بيكسل
بشوف العاج ورا الدومات معسل
بنيتا ما بتجيك واردة بتغسل
حسارها زاد علي والقلب بفسل
*****
خبك مو مشيك الليلة مالك
تتقل في اليمين وتجر شمالك
بنيتا لي شيومها بشني حالك
رقادا دونا قط لا تسيهو بالك
*****
قطعت الليد عرق حلة كنانة
زملنا الكرت يجابدن في الرسانة
طريت مردين كديس قوز البطانة
خشيما ما بجيب كلمة عفانة
******
بعد صليت ركب شاقي الصقيعة
قطع بت ناصر الليد الوسيعة
طريت أم شرشرا يحجا الوقيعة
ذويا حر صحيح خاتي النديعة
*****
قبوب ود زايد الحلالو باين
يجيهو التيس يصبق في الكماين
طريت بريبة الوادي أب عساين
تريع القلب صحيح وكتين تعاين
******
كربت يا جمل الخب أفرقو
اكسر الهيشة والتباس أمرقو
جنية الحكمو لا دارفور وبرقو
حسارها زاد علي والقلب تحرقو
*****
مما قم صغير المال بصرفو
أنا شكر البنات بالحيل بعرفو
ذويا بالتلاتة بيضوي سرفو
تجيني العافية يوم ادني واكرفو
*****
هديك الطلحة بانت لي زريبة
ترى القضروف دحين بقيت قريبة
أرح يا الفي العلوق معاك ويبة
رقادك يا أب مرار عند الحبيبة
*****
بشوف قضروف سعد حلولها طارن
زملنا أتباشرن بالتيه وغارن
زويلي الفي الظلام عينيه نارن
علي خرت الألوف أماتو شارن
*****
هكع سرف البوادرة الكير منوي
متل صقر البليب وكتين يخوي
ورحك يا أب مرار فوق هادا دوي
قرب يا تيس أم علي أب فاترن بضوي
*****
من الحيضان مسكنا الدرب مشينا
ختم كرتوب عرق حلة روينا
جنية لي سعد تالاها جينا
وصلنا الفي البنات سالكة وحسينة
******
بكان نوخ كرف ريحة جلادها
فلانة أم قرقدا عنف الوسادة
أمانة يا جماعة وفي الشهادة
منو الغير زولي حاق مسداري هادا
****
حايدانا الأمانة النشدة حارة
عجيلتك ها الوكيت فوق جيلها تاره
عناق الأريل الفوق قوزها فاره
هباب ما فرهدت ما قالو داره
*****
عناق أم سومري المرعاها جبرة
تحدثني حديثا كلو عبرة
أن جنيت تاني ما أظني ببرة
بلا عناب جناين وادي شبرة
*****
مشيت وجيت لقيت دلو السلوقي
يجوني الناس يعجو يقيفو فوقي
شاكي الغلبة لكن جد شوقي
متل جمل العلوق كل حين أهوقي
*******
فتحت الباب دخل عجلان عليها
لقيت أم خد تنور زي حليها
بنيتا من زمان شويمنا ليها
بشوف خلق الجمال مجموعة فيها
****
لقيت الكولا فوق لحفاتها نايمة
بكان ما تحس تخنق العبرة قايمة
جنية البي الغرب مردانو حايمة
ندهت الصالحين تبقى لي دايمة
******
تقول لي يا ولوف طول غيابك
تلاتة شهور تمام ماسكين حسابك
دحين وكتين حضر والمولى جابك
تعال لا تلجلج النوريك عتابك
******
أقول ليها العتاب لي ليه تشني
زمانا ماهو ده غيك مكني
أتركي ها العتاب لي روحي دني
بلاك لي من بنوح دايما واغني
تحدثني أم حديثا كلو زينة
وتقول لي يا ولوف ليش ما بتجينا
تلفخني أم وضيب روبتا دهينه
تكتفني أم زوير لكن حنينة
*******
تحدثني أم حديثا كلو فاقة
تقول لي يا ولوف ليش الإنطلاقة
تلفخني أم وضيب روبتا دقاقة
حقيقة اللوم بزيل وش الرفاقة
******
تقول لي يا ولوف لي أمي ماشه
بجيك بسراع وحاتك ماني غاشه
علي الفانوس بشوف دماعها باشه
أنا الفلاح وهي أفندينا باشه
*****
عجايب ها الزمن توريك كتيره
توزن الإبرة والفاس الكبيرة
دخلت القشلة دي ونقر بقيره
وتركت المرتقو وقام في الجزيرة
******
مما قم صغير فوقن بغني
خيار الحم كتار الجالسني
بنيتا ها الوكيت صبحت مدني
حسارها زاد علي بالحيل مكني
وبكرعى للعريباب ودني
******
أمانة يا أب دهب صادفاني غية
تعرب في الفؤاد نيرانها حية
أكان ما خوف مديرنا أب خمسمية
بكمل باقي عمري مع الجدية
******
حققنا الربوع يوما معاها نحاسه
فارق بو أم شليخ قصبة مناصح الخاسه
يوم قمت الصباح من حلة النحاسه
متل الشعبوهو وتبعو القواسة
*****
avatar
زكريا عبدالرازق

المساهمات : 119
تاريخ التسجيل : 16/02/2009
الموقع : zakaria22un@hotmail.com

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى